SERENATA - Sirinata a Maria

'Sta notti 'ncelu cu 'sta bedda luna
sentu a lu cori 'na malincunia
e caminannu pensu 'na canzuna
chi picciutteddu scrissi pì Maria.
E senza chi m'addugnu vaiu cantannu
sintennumi picciottu comu tannu:

Maruzza bedda affacciati
dimmi chi mi vò beni;
picchì a 'stu cori soffriri
vò fari tanti peni?
Stu cori senza amuri
nun pò campari cchiù;
c'è cu lu pò sarvari
lu po' sarvari tu.

E caminannu chianu pi la via
m'addugnu chi la strata avìa finutu
e mentri chi cuntentu mi crirìa
m'addugnu chi cantannu avìa chianciutu.
E cu li l'àrmi a l'occhi e cu la luna
adaciu cantu arrè la me' canzuna:

Maruzza bedda affacciati
dimmi chi mi vò beni;
picchì a 'stu cori soffriri
vò fari tanti peni?
Stu cori senza amuri
putìa sarvari tu
ora lu sentu moriri.
No, nun si sarva cchiù!

(Guglielmo Terrazzini - 1950 circa)